«Bon Voyage!»: musika, umorea eta antzerkia bat eginen dira Tafallan, sorpresaz beteriko bidaia batean

03/11/2026

Orthemis Orchestra taldeak ikuskizun berezia eskainiko du azaroaren 6an Tafalla Kulturgunean. Publiko guztiarentzako proposamen honek musika klasikoa, umorea, dantza eta keinu-antzerkia uztartzen ditu.

Zer gerta daiteke nazioarteko orkestra bateko hamar musikari aireportu bateko itxarongelan 24 orduz harrapatuta gelditzen direnean? Erantzuna Bon Voyage! ikuskizunak ekarriko digu. Orthemis Orchestra taldearen proposamen original eta harrigarria azaroaren 6an, ostiralean, 20:00etan, iritsiko da Tafalla Kulturgunera.

30 urte baino gehiagoko ibilbidea duen Orthemis Orchestra taldeak mundu osoko agertokiak eta ikusleak liluratu ditu musika klasikoa umorearekin eta keinu-antzerkiarekin uztartzeko duen modu bereziari esker. Oraingo honetan, taldeak beste urrats bat egin du bere sormen-proposamenean, zuzeneko musika, dantza, interpretazioa eta antzerki-eszenaratze zaindua uztartzen dituen ikuskizunarekin.

Istorioa aireportu batean hasten da. Ekaitz baten ondorioz, nazioarteko orkestra bateko hamar musikariren hegaldia bertan behera gelditzen da, eta 24 orduko itxaronaldi luze bati aurre egin beharko diote. Hasieran ustekabeko eragozpen hutsa dirudiena, pixkanaka, egoera barregarri, absurdo eta surrealisten segida bihurtuko da. Protagonisten nortasunek, haien arteko harremanek eta ustekabeko gorabeherek aireportua edozer gerta daitekeen agertoki bihurtuko dute.

Pertsonaia xarmangarrien, erritmo biziaren eta adierazkortasun handiko hizkuntza eszenikoaren bidez, Bon Voyage! ikuskizunak musika klasikoa ohiko konbentzioetatik ateratzen du, komediarekin, mugimenduarekin eta sorpresarekin bat eginez. Ikuskizun bisual eta dinamiko honek gozatzera, barre egitera eta esperientzia artistiko berezi batek eramaten uztera gonbidatzen gaitu, bai musikazaleak, bai antzerki-proposamen desberdinak bilatzen dituztenak.