Tafallako Jaiak 2026 | Egitarau ofiziala

30/07/2026

Tafallako Udalak asteazken honetan aurkeztu du abuztuaren 14tik 20ra ospatuko diren aurtengo herriko jaien egitaraua. Programa ofizialak 130 ekitaldi baino gehiago bilduko ditu, eta horiei gehitu behar zaizkie peñek eta gainerako elkarteek antolatutako jarduerak. Xabier Alkuaz alkateak eta Maitane Fernández Jaietako zinegotziak azaldu dituzte egitarauaren xehetasun nagusiak. Beste urte batez, adin guztietarako proposamenak eskainiko dira, eta jaien aurretik hamaika eguneko prejai egitaraua izango da, 35 jarduerarekin.

Aurkezpenean, Xabier Alkuazek jaiak antolatzeko lanean aritu diren jai batzordearen, elkarteen eta talde guztien lana eskertu zuen. «Jaiak publiko guztientzat prestatzen dira: haurrentzat, gazteentzat eta adinekoentzat», adierazi zuen alkateak, eta herritarrak zein bisitariak Tafallara etortzera gonbidatu zituen.

Halaber, gogorarazi zuen aurten Kulturgunearen ingurua erabat erabilgarri egongo dela, iazko udan obrek eragindako murrizketak amaitu ondoren. Era berean, datorren astean inguru horretan 40 bat aparkaleku berri jarriko direla iragarri zuen, bisitarien etorrera errazteko. Amaitzeko, jaiak «errespetuz eta elkarbizitzaz» gozatzeko deia egin zuen.

Jai aurreko astea

Maitane Fernándezek azaldu zuenez, jai aurreko egitaraua abuztuaren 1ean, larunbatean, hasiko da kadeteen txirrindularitza lasterketarekin, eta hamaika egunez luzatuko da, guztira 35 jarduerarekin.

Besteak beste, CD Teneriferen eta Athletic Cluben arteko nahiz Teneriferen eta Deportivo Alavésen arteko lagunarteko futbol partidak izango dira; pala motzeko partidak Eretan; MFC Chicken, Combo Batanga eta Kumbia Boruka taldeen kontzertuak; 2025ean jaiotako haurrei zapiak banatzeko ekitaldia, erraldoi, kiliki eta buruhandiekin; Txapeldunen Txapeldun Jota Lehiaketa; Martín Galdianoren ronda; zezen ekitaldiak; Artzainaren Milla; eta La Tafallesa bandaren kontzertua.

Zinegotziak nabarmendu zuen, gainera, abuztuaren 12rako aurreikusita dagoen Eguzki-eklipse osoa dela eta, efemeride horren inguruko jarduera berriak antolatu direla; ostiral honetan aurkeztuko dira. Berrikuntzen artean aipatu zituen, halaber, jaien aurreko larunbatean jokatuko den erremonte profesionaleko partida eta egun horretara bertara lekualdatuko den herri kirol erakustaldia, Ereta gunean.

Bestalde, ASCOTAk tokiko merkataritza sustatzeko kanpaina egingo du, jaiekin lotutako sariak zozketatuz. Prejaietarako aurrekontua 23.000 euro ingurukoa da.

Abuztuaren 14tik 20ra

Jaiei dagokienez, Maitane Fernándezek adierazi zuen entzierro txikiaren ordutegia 02:00etan mantenduko dela, baita plazako musika emanaldien ordutegia ere. Agertoki nagusian Argelio y los que son Van, Orquesta Equus, Puro Relajo, Orquesta La Principal, Jaian Jai, Orquesta Nueva Etapa eta Cover Rangers ariko dira. Musika programa horretarako ia 60.000 euroko aurrekontua bideratu da.

Haurrentzako eta gazteentzako jarduerek ere protagonismo berezia izango dute. Abuztuaren 14an, 16an eta 20an antzerki emanaldiak izango dira Escolapios ikastetxeko patioan; hilaren 15ean eta 18an ur-puzgarriak Ereta gunean; hilaren 17an jolas librearen azoka Conde parkean; eta berrikuntza gisa, abuztuaren 19an familia osoarentzako magia ikuskizuna egingo da Kulturguneko plaza berriko pergolan.

Gazteentzat, berriz, zezen freskagarria, DJ batekin afaria eta puzgarrien jardunaldia antolatu dira. Jarduera horietarako aurrekontua 17.000 euro ingurukoa da.

Musikak arratsaldeetan ere izango du bere lekua. Abuztuaren 15ean, 16an, 18an eta 19an Electrotxufla, Leytz, Mirari, Budin eta DJ Lobo ariko dira.

Gainera, abuztuaren 18an Euskararen Eguna ospatuko da. Goizean kantuz egingo da, ondoren herri bazkaria izango da Eretan —udalaren webgunearen bidez izena emanda—, eta arratsalde eta gauean musika-programazio osoa euskaraz izango da.

Zezenketen atalean, abuztuaren 15ean, 16an eta 17an zezenketak egingo dira; hilaren 18an novillada; 19an errekortadoreen lehiaketa; eta 20an peñen arteko Gran Prix-a. Entzierroa 09:00etan izango da, eta entzierro txikia 02:00etan. Zezen ekitaldi guztietarako aurrekontua 80.000 euro ingurukoa da.

Azkenik, zinegotziak iragarri zuen programa ofiziala ostegun honetan banatuko dela etxez etxe, eta eskerrak eman zizkien jaiak antolatzen laguntzen duten elkarte eta talde guztiei. Azpimarratu zuenez, haien lankidetza ezinbestekoa da urtero jaietako egitaraua aurrera eramateko.

EGITARAU OSOA IKUSI:

La entrada Tafallako Jaiak 2026 | Egitarau ofiziala se publicó primero en Ayuntamiento de Tafalla/Tafallako Udala.